Бишкек, 14.07.25. /Кабар/. Ала-Бука райондук маданият үйү капиталдык оңдоп-түзөөдөн өттү. Бул тууралуу президенттин Жалал-Абаддагы өкүлчүлүгүнөн билдиришти.
Жакында өкүл Тилек Текебаев райондук маданият үйүнүн капиталдык оңдоп-түзөө иштери менен таанышты.
Маданият үйүнүн имараты учурда капиталдык оңдоп-түзөөдөн өткөрүлүп, курулуш иштери райондук өнүктүрүү фонду тарабынан каржыланууда. Бул иштердин негизги максаты – калкка сапаттуу маданий кызмат көрсөтүү шарттарын түзүү жана маданият мекемелеринин материалдык-техникалык базасын чыңдоо болуп саналат.
Текебаев маданият үйүн максаттуу пайдалануу, жергиликтүү тургундардын чыгармачылык потенциалын өнүктүрүү, жаштарды маданий жана руханий тарбиялоо багытында натыйжалуу иштерди жүргүзүүнү тапшырды.
Ошондой эле ал курулуш иштери өз мөөнөтүндө жана сапаттуу жүргүзүлүшү зарылдыгын эскертип, тиешелүү жетекчилерге көзөмөлдү күчөтүүнү тапшырды.
Тилек Текебаев Ала-Бука айыл аймагынын Көлмө калктуу конушунда жаңы курулуп жаткан "Көлмө" бала бакчасы менен да жеринен таанышты. Мектепке чейинки мекеме райондук өнүктүрүү фонду тарабынан каржыланууда.
