Бишкек, 23.10.25. /Кабар/. Аксы райондук мамлекеттик администрациясы Кош-Дөбө айыл өкмөтү менен биргеликте жалпы 1000 гектар жер аянтына шамал электр станциясын курууну пландап жатат.
Райондук мамлекеттик администрациясынан билдиришкендей, бул долбоор аймактын энергетикалык коопсуздугун бекемдеп, экологиялык жактан таза энергиянын көлөмүн көбөйтүүгө өбөлгө түзөт.
Учурда сынамык үчүн Кош-Дөбө айыл аймагынан Чер жайлоосунун Кара-Байыр участкасында шамалдын ылдамдыгын аныктоочу атайын шайман орнотулду.
"Бул жабдык бир жылга сыноо мөөнөтү менен коюлуп, ошол аралыкта шамалдын ылдамдыгын аныктайт. Бир жылдан кийин атайын шамалдан электр энергиясын алуу үчүн 32 вентилятор орнотулуп, 200 МВт электр энергиясын Таш-Көмүр ГЭСине түз берүү пландалууда", - деп айтылат маалыматта.
Маалымат үчүн: Шамал энергетикасы атмосферадагы аба массаларынын кинетикалык энергиясын электр, механикалык, жылуулук энергиясына же эл чарбасында колдонууга ыңгайлуу болгон энергиянын башка түрүнө айландырууга адистешкен энергетика тармагы.
