Бишкек, 02.06.26. /Кабар/. Токтогул районундагы Чычкан капчыгайында орнотулган фотокапкандарга ак илбирс баштаган бир катар сейрек кездешүүчү жапайы жаныбарлар сүрөткө түшүп калды. Бул тууралуу "NABU Кыргызстан" уюмунан билдиришти.
Атайын жабдыктарды уюмдун кызматкерлери "Жашыл өрөөн" коомдук бирикмеси менен биргеликте 2025-жылдын ноябрь айында орнотушкан. Жакында чыгарып алынган сүрөт маалыматтарда аймакта ак илбирс, тоо эчки, куран-элик жана камандар байырлап жүргөнү аныкталды. Учурда адистер жаныбарлардын жүрүү багыттарын жана санын тактоо үстүндө иштеп жатышат.
Эске салсак, буга чейин "NABU Кыргызстан" уюму Чүйдүн "Чоң-Кемин" паркында жана Оштун Сарыгой капчыгайында орнотулган фотокапкандарды текшерип, алардан илбирс, сүлөөсүн, карышкыр, бугу-марал жана улар баш болгон ондон ашык жаныбарлардын түрүн каттоого алган.
Мындай мониторинг иштери сейрек кездешүүчү жаныбарларды изилдөөдө жана коргоодо маанилүү ролду ойнойт.
