Бишкек, 15.09.26. /Кабар/. Бүгүн, 15-сентябрда суу ресурстары, айыл чарба жана кайра иштетүү өнөр жайы министринин орун басары Мирбек Дүйшеевдин жетекчилиги алдында "Айыл чарбасында климаттын өзгөрүшүнө туруктуу кошумча нарк чынжырчаларын өнүктүрүү" долбоорунун алкагында жумушчу кеңешме өттү.
Ведомстводон билдиришкендей, кеңешмеге Айыл чарба долбоорлорун ишке ашыруу бөлүмүнүн (APIU) жана долбоордун өнөктөш финансылык институттары "Элдик Банк" менен "АБанк" ААКтарынын өкүлдөрү катышты.
Анда кредиттик ресурстарды жайгаштыруу жана өздөштүрүүнүн учурдагы жүрүшү, насыя берүүнү тездетүү боюнча чаралар, ошондой эле долбоордун финансылык компонентин ишке ашыруунун натыйжалуулугун мындан ары жогорулатуу маселелери каралды.
Кеңешменин жыйынтыгында тараптар айыл чарба тармагындагы ишкердикти колдоо, кредиттик ресурстарды натыйжалуу жана өз убагында жайгаштыруу боюнча биргелешкен ишти күчөтүү жөнүндө макулдашышты.
