Бишкек, 15.07.26. /Кабар/. Министрлер кабинетинин төрагасынын орун басары – суу ресурстары, айыл чарба жана кайра иштетүү өнөр жайы министри Акунбеков Эрлист Абакировичтин катышуусунда жүн иштетүү тармагын өнүктүрүү маселелерине арналган жолугушуу өттү.
Ведомстводон маалымдашкандай, жолугушууга жүндү кайра иштетүү тармагында иш алып барган ишкерлер, кайра иштетүүчү ишканалардын өкүлдөрү, ошондой эле Министрликтин түзүмдүк бөлүмдөрүнүн жана тиешелүү мамлекеттик органдардын өкүлдөрү катышты.
Жолугушуунун жүрүшүндө өлкөдөгү жүн өндүрүү жана кайра иштетүү тармагынын учурдагы абалы, тармактагы негизги көйгөйлөр, өндүрүштү өнүктүрүү мүмкүнчүлүктөрү, продукциянын сапатын жогорулатуу, инвестиция тартуу, экспорттук мүмкүнчүлүктөрдү кеңейтүү жана мамлекеттик колдоо чаралары боюнча кеңири талкуу жүргүзүлдү.
Катышуучулар тарабынан жүн иштетүү тармагын өнүктүрүүгө багытталган сунуш-пикирлер айтылып, өндүрүштү кеңейтүү, чийки затты натыйжалуу пайдалануу жана тармактын атаандаштыкка жөндөмдүүлүгүн жогорулатуу боюнча пикир алмашуу болду.
Жолугушуунун жыйынтыгында катышуучулар тарабынан айтылган сунуштарды эске алуу менен жүн иштетүү тармагын мындан ары өнүктүрүүгө багытталган тиешелүү чараларды ишке ашыруу боюнча макулдашууларга жетишилди.
