Бишкек 23.06.25 /Кабар/. Суу ресурстары, айыл чарба жана кайра иштетүү өнөр жайы министрлиги сыртта эмгек миграциясында жүргөндөргө жана өлкө ичиндеги жарандарга кунарсыз жерлерди өздөштүрүп, киреше булагын табууга жана арттырууга чакырат.
Ведомствонун маалыматына караганда, Толубай Жалилов Кадамжай районунун Молдо-Нияз айыл аймагындагы кунарсыз жайытты 20 жылга ижарага алып, жаңы технологияларды колдонуп иштете баштаган.
Ал алгач асылдуулугу төмөн жерге өрүктүн "болеро", "микада" жана "присса" көчөттөрүн отургузган. Ошону менен жалпысынан мурун кунарсыз делген аймакка 4,5 миң өрүктүн көчөтү тигилген. Ал көчөттөргө сууну сарамжалдуу жеткирүү максатында 6,5 миң куб сууга эсептелген көлмө куруп, тамчылатып сугаруу системасын орноткон. Көчөттөргө көлдөн бирдиктүү температурадагы суу берилет. Себеби, суу кээде ысып, кээде муздап кетет. Ал көчөт үчүн зыян.
"Өздөштүрүүгө 1-2 гектардан алгандар 10-15 адам болуп биригип алып, кооператив түзүп, чыгымдарды чогуу тартышса өзүн актайт. Биригүүнүн натыйжасы эң сонун болот. Азыр өрүктөн пайда түшкөнгө чейин дарбыз, помидор, бадыраң сыяктуу өсүмдүктөрдү өстүрүп, киреше таап жатабыз. Мындай жакшы иштер айыл чарба министри Бакыт Төрөбаевдин кунарсыз жерлерди өздөштүрүү боюнча тапшырмасынын артынан ишке ашып турат. Ал бул жерге өзү келип, баштапкы көчөттү отургузуп кеткен", - дейт дыйкан.
Белгилей кетсек, жалпы республика боюнча 614 миң гектар кунарсыз жайыттар аныкталган. Министрлик ушул жерлерди өздөштүрүп, Кыргызстанды жашыл аймакка айлантуу менен киреше табууга чакырат.
