Бишкек, 15.09.25. /Кабар/. Бишкек шаарынын мэри Айбек Жунушалиев Ленин районун кыдырып, маанилүү инфраструктуралык объектилердин даярдыгын жана жүрүп жаткан иштердин абалын жеринде көрүп чыкты. Бул тууралуу муниципалитеттен билдиришти.
Маалыматка ылайык, шаар башчысы Интергельпо көчөсүнүн Димитров көчөсүнөн “Континент” соода борборуна чейинки бөлүгүндөгү капиталдык оңдоо иштеринин жүрүшү менен таанышты. Бул иштер “Бишкекасфальтсервис” ишканасы тарабынан мурда башталган долбоорлорду жыйынтыктоо алкагында аткарылууда. Бул тилкеде акыркы капиталдык оңдоо 30 жылдан ашык убакыт мурун жүргүзүлгөн.
Андан соң мэр М.В. Фрунзе атындагы темир заводуна барып, ишкерлер менен жолугушту. Текшерүү учурунда ишкананын аймагына асфальт төшөө, дөңгөлөк жуугуч аппарат орнотуу жана салмак-габариттик көзөмөл жабдууларын коюу боюнча сунуштар берилди.
Ошондой эле Мурман менен Абакан көчөлөрүнүн ортосунда жайгашкан сейил бактагы иштер текшерилди. Жалпы аянты 2,48 гектарды түзгөн аймакта жер иштери аяктап, бордюрлар коюлган. Сейил бактын аймагында балдар аянтчасы, воркаут-зона, чуркоо жолу курулуп, көчө чырактары, отургучтар, шахмат столу жана таштанды челектери орнотулду.
Мындан тышкары, аймакка 150 түп дарак — липа, платан, ясень жана мажүрүм тал отургузулуп, жашылдандыруу иштери жүргүзүлдү. Жашыл көчөттөрдү сугаруу үчүн автосугат системасы орнотулуп, жалпы узундугу 598 метр болгон ПВХ түтүктөр тартылды жана 414 дренаждык лоток коюлду. Мэр Айбек Жунушалиев “Бишкекжашылкурулуш” ишканасы менен биргеликте дарактарга тамчылатып сугаруу үчүн атайын баштыктар менен кошумча жабдуу орнотууну тапшырды.
Мындан тышкары, мэр Алыкулов жана Жайыл баатыр көчөлөрүнүн кесилишинде курулуп жаткан Нүзүп Эсенбай уулунун 230 жылдыгына арналган эстеликтин курулушунун жүрүшүн көзөмөлдөдү. Учурда эстеликтин постаменти орнотулуп, мрамор менен каптоо иштери жана айланасын көрктөндүрүү, декоративдик өсүмдүктөрдү отургузууга даярдык жүрүүдө. Эстелик “Нүзүп Миңбашы” фондунун каражаттарынын эсебинен курулууда. Шаар башчысы бардык иштердин сапатына өзгөчө көңүл буруп, долбоорду кыска мөөнөттө бүтүрүүнү тапшырды.
