Бишкек, 22.08.25. /Кабар/. Президенттин Баткен облусундагы өкүлү Айбек Шаменов аткезчиликке каршы күрөшүү максатында уюшулган Төрт-Гүл айыл аймагындагы Развилка жана Сүлүктү шаарындагы Кольцо постторунун ишмердүүлүгү менен таанышты.
Өкүлчүлүктөн маалымдашкандай, Айбек Шаменов постто турган чек ара, бажы, ветеринардык кызматтын, ички иштер органдарынын кызматкерлерине облус аймагына алып келинип жаткан мал жандыктарын ар бирин тыкыр көзөмөлгө алууну тапшырды.
Ошондой эле ал постто кулак сырганы (бирка) каттап, кайсы мал союучу жайга баргандыгы боюнча бардык тийиштүү органдар биргеликте тыгыз иш алып барууну милдеттендирилди.
Облус башчысы мал жандыктарын алып-сатуу менен алектенген жарандар менен да жолугуп, облус аймагында эт азыктарынын баасын турукташтыруу жана эт таңкыстыгын жөнгө салуу максатында аткезчиликке каршы күрөш уланарын билдирди.
Мындан тышкары, облус башчысы чек арага чектеш аймактарда жергиликтүү бийлик органдары менен укук коргоо органдарынан түзүлгөн мобилдүү топтор иштеп жатканын белгилеп, аткезчилик жол менен кошуна өлкөлөргө мал өткөрүү фактылары аныкталса, мыйзам чегинде катуу чаралар көрүлөөрүн айтты.
