Бишкек, 10.07.25. /Кабар/. Агартуу министри Догдуркүл Кендирбаева Ислам өнүктүрүу банкынын өкүлдөрү менен Smart-Ed долбоорун талкуулады. Бул тууралуу ведомстводон маалымдашты.
Жолугушууга банктын Алматы шаарындагы аймактык кеңсесинин жетекчиси Али Мухаммад Хан жана башкалар катышты.
Жолугушууда Ислам өнүктүрүү банкы, Ислам өнүктүрүү тилектештик фонду жана Билим берүү боюнча глобалдык өнөктөштүктүн биргелешкен Smart-Ed долбоору талкууланды.
Министр Догдуркүл Кендирбаева инклюзивдик билим берүү “Алтын Казык” билим берүүнү трансформациялоо программасынын маанилүү бөлүгү болуп саналарын, бул багытта көздөгөн максаттарга жетүү министрликтин негизги приоритеттеринин бири экенин баса белгиледи.
Белгилей кетсек, Smart-Ed долбоору боюнча макулдашууларга 2025-жылдын 22-апрелинде Вашингтон шаарында кол коюлган. Долбоордун максаты Кыргызстандагы бардык балдар үчүн инклюзивдик жана сапаттуу билим алууга бирдей мүмкүнчүлүк түзүү болуп саналат.
