Бишкек, 21.07.26 /Кабар/. Бишкектеги Жусуп Абдрахманов жана Москва көчөлөрүнүн кесилиши көрктөндүрүлөт. Бул тууралуу Курулуш, архитектура жана турак жай-коммуналдык чарба министрлигинен билдиришти.
Маалыматка ылайык, көрктөндүрүү боюнча эскиздик долбоор Бишкек шаар куруу жана архитектура башкы башкармалыгынын адистери тарабынан иштелип чыкты.
Долбоордун негизги максаты борбор калаанын тургундары жана коноктору үчүн заманбап жана көп функционалдуу шаардык мейкиндик түзүү болуп саналат.
Долбоордун алкагында төмөнкү функционалдык жайларды түзүү каралган:
- эс алуу жайы;
- шахмат ойноочу аймак;
- көчө китепканасы;
- балдар үчүн оюн аянтчасы;
- спорттук машыгуу аянтчасы;
- фонтандарды жаңылоо;
- унаа токтотуучу жай;
- коомдук даараткана.
Ошондой эле долбоордо унаа токтотуучу жана жөө жүргүнчүлөр үчүн жайлар каралган. Бул аймакты жөө басууга жана эс алууга ыңгайлуу, коопсуз мейкиндикке айландырууга шарт түзөт.
Ал эми долбоорду ишке ашыруу жана аймакты көрктөндүрүү иштери Бишкек шаарынын мэриясы тарабынан жүргүзүлөт.
