Бишкек, 09.03.26. /Кабар/. Араван районундагы "Бирлик" үрөн чарбасы жаңы техника менен картошка эгүүдө. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Маалыматка ылайык, бул техника талаада 5 жумушту бир эле учурда аткара алат. Ал дыйкандардын ишин жеңилдетип, талаа иштерин натыйжалуу жана ыкчам жүргүзүүгө мүмкүнчүлүк түзөт.
Жаңы техниканын негизги өзгөчөлүктөрү:
- отоо чөптөргө каршы дары чачып, түшүмдүн сапатын жогорулатат;
- картошканы 90 см аралыкта бир нече жөөккө эгип, эффективдүүлүктү арттырат;
- тамчылатып сугаруу системасына ылайык шлангды орнотуп, суунун үнөмдөлүшүн камсыздайт;
- жер семирткичти себет аркылуу чачып, топурактын азыктанышына көмөк көрсөтөт;
- полиэтилен пленкасын жаап, топуракты коргойт жана нымдуулукту сактайт.
"Эгер быйылкы жылы жаңы техника өзүнүн натыйжалуулугун көрсөтсө, келерки жылы бул технология башка дыйкандарга да сунушталат", — деп айтылат маалыматта.
