Бишкек, 16.07.26. /Кабар/. Суу ресурстары, айыл чарба жана кайра иштетүү өнөр жайы министринин орун басары – Суу ресурстары кызматынын директору Алмаз Жээналиев Тоң районуна жумушчу сапары менен барды.
Ведомстводон билдиришкендей, сапардын алкагында жетекчи аймактагы коллектордук-дренаждык тармактарды тазалоо иштеринин жүрүшү менен таанышып, андан соң Ислам өнүктүрүү банкынын каржылоосу менен курулуп жаткан Үч-Коргон суу сактагычынын курулуш аянтына барды.
Суу сактагыч Тоң дарыясынын вегетациялык эмес мезгилдеги агымын натыйжалуу пайдаланууга жана аймактагы дыйкандарды сугат суу менен туруктуу камсыздоого багытталган.
"Долбоордун алкагында 4,3 млн куб метрди түзгөн сезондук жөнгө салуу бассейни курулуп, анын аркасында 817 гектар жаңы жер өздөштүрүлөт. Ошондой эле 4113 гектар сугат жердин суу менен камсыздалышы кыйла жакшырат", - деп айтылат маалыматта.
Иш сапардын жыйынтыгында Алмаз Жээналиев курулуш иштеринин сапатына жана анын белгиленген мөөнөттө сапаттуу бүткөрүлүшүнө өзгөчө көңүл буруп, жооптуу адистерге тиешелүү тапшырмаларды берди.
