Бишкек, 24.09.25. /Кабар/. Быйыл 128 өндүрүш ишканасын ишке берүү мерчемделген. Учурда алардын басымдуу бөлүгү ишке кирип, айрымдарынын курулушу уланууда. Анын катарында Аксы районунун Кара-Жыгач айыл аймагындагы Авлетим жана Кара-Суу дарыяларынын кошулган жеринде курулуп жаткан бул чакан ГЭСтин кубаттуулугу 2.3 МВтты түзөт. Курулушу 2023-жылы башталган ГЭС ишке берилсе жергиликтүү калктын кошумча электр муктаждыктарын жабууга мүмкүнчүлүк түзүлөт.
Чакан ГЭСтин курулушун жүргүзүп жаткан "Сапат электр" ЖЧКсынын директору Арген Сүйүмбек уулунун "Кабар" агенттигине билдиргенине караганда, ГЭСтин курулушу долбоорго ылайык 2023-жылы башталган.
"Учурда курулуш иштери аяктоо алдында турат. Негизинен курулуш иштерин үч бөлүккө бөлүп кароо керек. Учурда суу топтоочу жайдын курулушу 80 пайызга, каналдын курулушу 70 пайызга, ал эми ГЭСтин административдик имаратын куруу иштери 80 пайызга бүткөрүлдү.
Ал эми чакан ГЭСтин долбоордук кубаттуулугу 2.3 МВтты түзөт. Бул болжол менен 350-400 түтүндү электр жарыгы менен камсыздай алат", - деди ал.
Сүйүмбек уулунун айтымында, учурда болжол менен 30-40 жумушчу курулуш иштерин жүргүзүүдө.
"Ал эми ГЭС ишке киргенден кийин 10-15 жумушчу туруктуу иш менен камсыз болот", - деген ал керектелүүчү бардык жабдыктар Кытайдан алып келингенин белгиледи.
Ошондой эле компаниянын жетекчиси долбоордун инвестициялык көлөмү 2,4 млн долларды түзөрүн кошумчалады.
