Бишкек, 28.04.26. /Кабар/. Бүгүн Чаткал районундагы ГЭСтер каскадын куруу иштерине старт берилди.
Президенттин Жалал-Абад облусундагы өкүлчүлүгүнөн билдиришкендей, ГЭСтер каскадын куруу долбоору мамлекеттик-жеке өнөктөштүктүн алкагында ишке ашырылып, ага 259,8 млн доллар өлчөмүндө инвестиция тартылат. Мындан тышкары, миң гектардан ашык жер аянттары сугат суу менен камсыз болот.
Бүгүн анын алкагында эки ири энергетикалык долбоордун курулушу башталды. Биринчиси Каныш-Кыя айыл аймагынын "Кара-Корум" участкасында кубаттуулугу 5 МВт болгон муниципалдык чакан ГЭС, экинчиси Жаңы-Базар айылында кубаттуулугу 1 МВт болгон муниципалдык күн электр станциясы.
Чакан ГЭС жылына орточо 20 млн кВт/саатка жакын электр энергиясын өндүрүүгө жөндөмдүү болсо, күн электр станциясы жылына 1,6 млн кВт/саат электр энергиясын иштеп чыгарат. Бул көрсөткүчтөр аймактагы электр энергиясына болгон тартыштыкты азайтып, импортко болгон көз карандылыкты төмөндөтүүгө өбөлгө түзөт.
Долбоорлорду ишке ашыруу үчүн жалпысынан 8 млн долларга жакын инвестиция тартылат. Каржылоо булактары катары мамлекеттик колдоо, муниципалдык ресурстар жана жеке инвесторлордун каражаттары каралган. Курулуш иштери аяктагандан кийин 100дөн ашык жаңы жумуш орундары түзүлөт.
