Бишкек, 13.07.26. /Кабар/. Чоң-Алай районунун стратегиялык мааниге ээ болгон "Миң-Жар" каналынын курулушу кызуу жүрүүдө.
Суу ресурстары, айыл чарба жана кайра иштетүү өнөр жайы министрлигинен билдиришкендей, долбоордун башкы максаты буга чейин суу жетпеген, кунарсыз жана натыйжалуу пайдаланылбай келген жайыт жерлерди өздөштүрүп, айыл чарба жүгүртүүсүнө киргизүү болуп саналат.
"Канал курулуп бүтсө 1400 гектар жаңы жер сугат суу менен камсыз болот. Жаңы өздөштүрүлгөн аймактарга картошка, тоют өсүмдүктөрү жана дан эгиндери эгилип, мал чарбачылыгы үчүн тоют базасы бекемделет. Ал эми жергиликтүү калк үчүн жаңы жумуш орундары түзүлүп, киреше булагы көбөйөт", - деп айтылат маалыматта.
Адистердин айтымында, Миң-Жар каналынын ишке кириши Чоң-Алай районунун ирригациялык инфраструктурасын гана жакшыртпастан, аймакта азык-түлүк коопсуздугун камсыздоого жана айыл чарбасын туруктуу өнүктүрүүгө олуттуу түрткү берет.
