Бишкек, 23.09.25. /Кабар/. Бишкек–Күнтуу–Шопоков унаа жолунда оңдоо жана кеңейтүү иштери кызуу жүрүүдө. Бүгүнкү күндө аталган жолдун 3,9-чакырымында бир тараптуу 1,5 чакырым аралыкка жаңы асфальт жабылды.
Транспорт жана коммуникациялар министрлигинен билдиришкендей, жеринде 128 кызматкер жана 60 техника иш алып барууда. Жолдун жалпы узундугу 12,4 чакырым болуп, анын 6,7 чакырымы быйыл оңдолот деп мерчемделген.
Долбоорго ылайык, жол төрт тилкеге чейин кеңейтилет, тротуарлар курулуп, көчө жарыктандыруусу орнотулат. Ошондой эле мурда кыйылган бактардын ордуна жаңы көчөттөр отургузулат.
