Бишкек, 24.11.25. /Кабар/. Ак-Суу районунда машина-трактор станция уюштурулду. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Иш-чарага министрлер кабинетинин төрагасынын орун басары – айыл чарба министри Бакыт Төрөбаев катышты.
Аталган станция Түп, Ак-Суу жана Жети-Өгүз райондорунда картошка өндүрүүнүн көлөмүн көбөйтүү, өндүрүлгөн продукциянын сапатын жогорулатуу жана анын өздүк наркын төмөндөтүү, азык-түлүк коопсуздугун камсыз кылуу жана социалдык-экономикалык абалды жакшыртуу максатында ишке ашырылды.
МТС уюштуруу үчүн президенттин фондунан 108 млн сом бөлүнүп берилген. Учурда 32 техника алып келинди. Анын ичинен 10у картошка казуучу комбайн. Дагы 60тан ашык техникалар заводдорго буйрутма берилип жасалып жатат.
МТСтин материалдык техникалык базасын түзүү үчүн Ак-Суу айылынан 0,54 га жер аянтын ээлеген мурунку Сельэнерго ишканасынын административдик корпусу жана курулуштары өткөрүлүп берилген.
