Бишкек, 07.04.26. /Кабар/. Саламаттык сактоо министри Дамир Осмонов Түркиянын Кыргызстандагы элчиси Мекин Мустафа Кемаль Окем менен жолугушту. Бул тууралуу аталган министрликтен билдиришти.
Маалыматка ылайык, тараптар саламаттык сактоо тармагындагы кыргыз-түрк кызматташтыгынын негизги маселелерин талкуулашты. Өзгөчө кыргыз жарандарын Түркияда акысыз квоталардын негизинде дарылоого жөнөтүү программасын ишке ашырууга басым жасалды. Эми жыл сайын 150 квота аркылуу кыргызстандыктар Түркиянын мамлекеттик клиникаларында жогорку квалификациялуу медициналык жардамды акысыз ала алышат.
Тараптар ошондой эле медициналык кадрларды даярдоо маселелерин талкуулашты. Кыргыз тарап ата мекендик адистерди Түркиянын алдыңкы клиникаларында 3 айдан 6 айга чейинки мөөнөттө стажировкадан өткөрүү программаларын мындан ары кеңейтүүгө кызыкдар экенин билдирди. Стажировкага жөнөтүлө турган адистердин тизмеси жакынкы аралыкта түрк тарапка берилет.
Мындан тышкары, органдарды трансплантациялоо жаатындагы кызматташтыкты өнүктүрүү, анын ичинде тажрыйба алмашуу, адистердин квалификациясын жогорулатуу жана Режеп Тайип Эрдоган атындагы Кыргыз-түрк достук ооруканасынын базасында мындан аркы өз ара аракеттенүү маселелери каралды.
