Бишкек, 19.08.26 /Кабар/. Күн мурун Нарын облусунун башчысынын биринчи орун басары Эркинбек Чекирбаев Жумгал районуна иш сапары менен барып, бир катар маанилүү объектилерди жеринен көрүп, көйгөйлүү маселелерди талкуулап, аткарылып жаткан иштердин жүрүшү менен таанышты.
Өкүлчүлүктөн билдиришкендей, алгач ал Түндүк–Түштүк альтернативдүү унаа жолунун райондон өткөн бөлүгүндөгү кооптуу участокторго дөңсөөлөрдү орнотуу боюнча жыйын өткөрдү.
Андан соң Миң-Куш айылындагы Агулак көмүр кесимине барып күз-кыш мезгилине даярдыгын текшерди.
Иш сапар Көк-Ой айылындагы Султан Турусбек уулу атындагы жалпы билим берүү мектебинин спорт залынын жана Лама айылындагы жалпы билим берүү мектебинин курулуш иштерин көрүү менен уланды.
Соңунда президенттин Турукташтыруу фондунун каржылоосу менен Жумгал айыл өкмөтүнө алынган экскаватор жана райондук өнүктүрүү фондунан Миң-Куш айылына алынган суу чачуучу техника тапшырылды.
