Бишкек, 15.11.25. /Кабар/. Жумгал райондук электр тармактарынын жаңы административдик имараты пайдаланууга берилди. Бул тууралуу Энергетика министрлигинен билдиришти.
Иш-чарага министр Таалайбек Ибраев жана "Кыргызстан улуттук электр тармагы" ААКтын башкы директору Илгиз Сыдыгалиев катышты.
"Жумгал сыяктуу тоолуу райондордо энергетика тармагы — турмуштун негизи. Бул жаңы имарат — биздин кызматкерлерге болгон камкордуктун жана аймактардагы инфраструктураны өнүктүрүүгө болгон ырааттуу саясаттын жыйынтыгы. Энергетикалык кызмат көрсөтүүнүн сапаты түздөн-түз кызматкерлердин шартынан көз каранды, ошондуктан мындай курулуштардын мааниси чоң", - деди министр өз сөзүндө.
Эки кабаттуу, жалпы аянты 360 чарчы метрди түзгөн имараттын сметалык баасы 21 млн 215 миң сомду түздү. Курулуш "Кыргызстан улуттук электр тармагы" ААКсы тарабынан каржыланды.
