Бишкек, 24.08.26. /Кабар/. Жогорку Кеңештин депутаттары Нилуфар Алимжанова, Улан Сариев жана Алтынкүл Мурзакимова Көз карандысыз мамлекеттердин шериктештигине катышкан мамлекеттердин Парламенттер аралык ассамблеясынын (КМШ ПАА) жана Жамааттык коопсуздук жөнүндө келишим уюмунун Парламенттик ассамблеясынын (ЖККУ ПА) эл аралык миссияларынын курамында Казакстандын Курултайынын депутаттарын шайлоого байкоо жүргүзүштү.
Парламенттен билдиришкендей, байкоо жүргүзүүнүн алкагында депутаттар шайлоо процессинин катышуучулары менен жолугушууларды өткөрүп, шайлоо алдындагы өнөктүктүн жүрүшү, добуш берүүгө даярдык жана Казакстандын саясий партияларынын ишмердүүлүгү менен таанышты.
Алсак, 21-августта депутат Нилуфар Алимжанова ЖККУ ПАнын миссиясынын курамында Казакстандын Борбордук шайлоо комиссиясынын төрагасы Нурлан Абдиров менен жолугушту. Тараптар добуш берүүгө даярдык көрүү, шайлоо тилкелерин техникалык жактан жабдуу жана шайлоо процессинин ачык-айкындуулугун камсыз кылуу маселелерин талкуулашты.
Андан соң 22-августта Астана шаарында ЖККУ ПАнын байкоочулары менен Казакстандын Коргоо министрлигинин жетекчилигинин жолугушуусу өттү. Анда негизги темаларынын бири аскер кызматчыларынын жана алардын үй-бүлө мүчөлөрүнүн шайлоо укуктарын камсыз кылуу маселеси болду.
Добуш берүү күнү, 23-августта Жогорку Кеңештин депутаттары шайлоо участокторундагы добуш берүү процессине байкоо жүргүзүүгө катышты. Жыйынтыгында депутаттар жарандардын жогорку активдүүлүгүн жана калктын шайлоого болгон кызыгуусун белгилешти.
Иш-чараларга КМШ ПАА жана ЖККУ ПА кеңешинин башкы катчысынын орун басары, Жогорку Кеңештин аталган уюмдардагы ыйгарым укуктуу өкүлү Нурбек Сатвалдиев да катышты.
