Бишкек, 26.05.25. /Кабар/. Бүгүн, 26-майда Жалал-Абад шаарынын мэри Эрнисбек Ормоков Б.Осмонов атындагы №5 мектептин бүтүрүүчүлөрүнүн “Акыркы коңгуроо” салтанатына катышты.
Муниципалитеттен билдиришкендей, шаар башчысы бардык мектеп бүтүрүүчүлөрүнө ийгиликтерди каалап, аларды жогорку орто жана окуу жайларында татыктуу билим алып, өлкөбүздүн өнүгүүсүнө салым кошууга чакырды.
Майрамдык иш-чарага шаардык кеңештин депутаттары Назгүл Айдарова, Айбек Тешебаев, шаардык билим берүү бөлүмүнүн башчысы Ырысбек Калчаев, мектепти мындан 20 жана 35 жыл мурда аяктаган бүтүрүүчүлөр да катышып, бүтүрүүчүлөрдү "Акыркы коңгуроо" салтанаты менен куттуктап сыйлыктарды тапшырышты.
Белгилей кетсек, быйыл Жалал-Абад шаарында 1525 окуучу 11-классты, 3715 окуучу 9-классты аяктап жатат.
Президенттин Жалал-Абад облусундагы өкүлчүлүгүнөн билдиришкендей, облус аймагында 485 жалпы билим берүү мектепте акыркы коңгуроо кагылып, 10 миң 316 окуучу 11 классты, 24 миң 600 окуучу 9-классты аяктады.
