Бишкек, 18.06.26. /Кабар/. Талас шаарындагы "Баатырлар" паркынын аймагында курулуп жаткан заманбап балдар оюн-зоок паркынын курулуш иштери акыркы баскычына жетти.
Президенттин облустагы өкүлчүлүгүнөн билдиришкендей, жаш муундардын коопсуз жана көңүлдүү эс алуусу үчүн шарт түзө турган бул жайдын ачылыш аземи жакынкы күндөрү өтөт.
"Бул долбоор өлкө башчысы Садыр Жапаровдун колдоосу менен аймактарды өнүктүрүү жана элдин жашоо-шартын жакшыртуу саясатынын алкагында ишке ашууда", - деп айтылат маалыматта.
Белгиленгендей, жаңы парк бала бакча курагындагы жана мектеп жашындагы бөбөктөрдүн гана эмес, бүтүндөй Талас шаарынын тургундарынын сүйүктүү үй-бүлөлүк эс алуу борборуна айланмакчы.
