Бишкек, 05.11.26. /Кабар/. Баткен шаарындагы негизги көчөлөрдүн айрым тилкелери төрт тилкелүү болуп кеңейтилүүдө.
Президенттин аймактагы өкүлчүлүгүнөн билдиришкендей, жол куруу иштерине республикалык бюджеттен 100 млн сом каралган.
"Мурат Салихов жана Сайдиман ажы көчөлөрүнүн бир чакырым жолуна эки катмар асфальт төшөлүп, жол чырактары жаңыланат жана бордюрлар орнотулат", - деп айтылат маалыматта.
Мындан тышкары, шаарда курулуп жаткан 10 миң орундуу футбол стадионуна баруучу жолду да төрт тилкелүү кылып кеңейтүү жана асфальттоо иштери жүрүүдө.
Курулуш иштеринин жүрүшү менен президенттин Баткен облусундагы ыйгарым укуктуу өкүлүнүн биринчи орун басары Бактыбек Токсонбаев таанышты. Ал тиешелүү мекеме-ишканалардын жетекчилерине иштерди тездетип, жолдорду сапаттуу жана белгиленген мөөнөттө бүткөрүүнү тапшырды.
Жолдорду оңдоо жана кеңейтүү иштерин №7 Баткен облустук жол башкармалыгы жүргүзүүдө.
