Бишкек, 14.05.26. /Кабар/. Саламаттык сактоо министрлиги өзгөчө коркунучтуу инфекцияларга, анын ичинде хантавируска шектелген учурларга жооп кайтаруу боюнча ведомстволор аралык штабдык машыгуу өткөрдү.
Ведомстводон маалымдашкандай, анда кооптуу вирус аныкталган учурда медициналык кызматтардын жана аэропорттун санитардык-карантиндик пункттарынын өз ара аракеттенүүсү текшерилди.
Ошондой эле ооруканалардын бейтаптарды обочолонтууга даярдыгы, биологиялык коопсуздук чаралары, лабораториялык диагностика жана кызматкерлердин жеке коргонуу каражаттары менен камсыз болушуна өзгөчө көңүл бурулду.
Машыгуунун жыйынтыгы саламаттык сактоо министринин орун басары Гүлбара Ишенапысованын жетекчилиги алдында талкууланды. Кырдаал борборунда өткөн жыйында кызматтардын аракеттерине талдоо жүргүзүлүп, инфекциялык коркунучтарга жооп кайтаруу системасын мындан ары өркүндөтүү боюнча кошумча чаралар иштелип чыгаары белгиленди.
Иш-чарага Оорулардын алдын алуу жана мамсанэпидкөзөмөл департаменти, Республикалык жугуштуу оорулар ооруканасы, “Манас” аэропортунун кызматкерлеру, тез жардам кызматы жана эл аралык уюмдардын өкүлдөрү катышты.
