Ташкент, 03.10.25. /Кабар/. Өзбекстандын Адам укуктары боюнча улуттук борборунда миграция маселелерине арналган өзбек-орус тегерек столу өттү.
Иш-чаранын негизги максаты – КМШ өлкөлөрүндө миграциялык саясатты өркүндөтүү, бирдиктүү эмгек рыногун түзүү жана кызматташтыкты чыңдоо болду.
Өзбекстандын Адам укуктары боюнча улуттук борборунун директору Акмал Саидов демилгенин аймак үчүн стратегиялык мааниге ээ экенин белгилеп, миграция адам укуктарын коргоо, экономикалык туруктуулук жана социалдык интеграция менен түздөн-түз байланышта экенин айтты.
Россия президентинин кеңешчиси Валерий Фадеев миграция тармагында көйгөйлөр көп экенин белгилеп, аларды жашырбай, биргеликте чечүү зарылдыгын баса белгиледи. Ал сунуштарды камтыган жыйынтык документ даярдалып, эки өлкөнүн парламенттери менен аткаруу бийлигине жөнөтүлүшү керектигин билдирди.
Жыйынтыгында катышуучулар миграциялык саясатты үзгүлтүксүз өркүндөтүү зарылдыгын белгилеп, КМШда бирдиктүү эмгек рыногун түзүү юридикалык же экономикалык гана эмес, миллиондогон адамдардын татыктуу жашоосун камсыздоого багытталган гуманитардык долбоор экенин белгилешти.
Иш-чараны Өзбекстандын Адам укуктары боюнча улуттук борбору Миграция агенттиги жана Тышкы иштер министрлиги Россия президентинин алдындагы Жарандык коомду өнүктүрүү кеңеши жана «Петербург диалогу» форуму менен биргеликте уюштурду.
