Бишкек, 07.12.25. /Кабар/. Күн мурун белгилүү композитор, КР эл артисти, Токтогул атындагы мамлекеттик сыйлыктын лауреаты, профессор Муратбек Бегалиевдин 70 жаш мааракесин белгиледи. Бул тууралуу Маданият, маалымат жана жаштар саясаты министрлигинен билдиришти.
Иш-чарага маданият министри Мирбек Мамбеталиев, чет элден келген коноктор, коомдук ишмерлер, маданият жана искусство өкүлдөрү катышты.
Министр Муратбек Акимовичтин өлкөнүн музыкалык өнүгүшүнө кошкон эбегейсиз салымы, анын чыгармачылыгы жана элге кылган кызматын өзгөчө урматтоо менен белгиледи. Өмүрүнүн көп бөлүгүн музыка өнөрүнө арнаган залкар композитор кыргыз маданиятынын дүйнөлүк деңгээлге чыгышына зор түрткү берди.
Композитордун «Помпейдин акыркы күнү», «Балалыктын обондору», «Майрамдык увертюра», «Манас-соната», «Кыргыз сюитасы» сыяктуу чыгармалары улуттук жана эл аралык сахналарда кеңири аткарылып келгенин сыймыктануу менен айтты.
Улуттук маданиятка кошкон чоң салымы үчүн Муратбек Акимович «Манас» орденинин III даражасы менен сыйланган. 2024-жылдын сентябрынан тарта ал А.Малдыбаев атындагы Кыргыз улуттук академиялык опера жана балет театрын жетектеп келет.
