Бишкек, 18.05.25. /Кабар/. Күн мурун саламаттык сактоо министри Эркин Чечейбаев жумушчу сапарынын алкагында Ысык-Көл облусунун Ананьево айылында курулуп жаткан 100 орундуу көп тармактуу оорукананын курулушу менен таанышты.
Министрликтин маалыматына караганда, жаңы медициналык мекемеде хирургия, реанимация, төрөт жана башка бөлүмдөр болот. Учурда аймактагы бейтаптар 25 орундуу бөлүм менен гана тейленип, дарылануу үчүн көбүнесе Чолпон-Атага барууга мажбур.
Курулуш иштерин “Кыргызкурулушсервис” мамлекеттик ишканасы жүргүзүүдө. Объект министрлер кабинетинин токтомуна ылайык салынууда.
“Бул — келечек муундардын саламаттыгына болгон инвестиция. Аймак тургундары керектүү жардамды жакын жерден ала алышат”, — деди министр Эркин Чечейбаев.
Бул долбоор министрлер кабинетинин токтомуна ылайык ишке ашырылууда.
