Бишкек, 29.07.26. /Кабар/. Министрлер кабинетинин төрагасынын орун басары Улан Маматканов Чолпон-Ата шаарында Кыргызстан жана Өзбекстандын жогорку окуу жайларынын ректорлорунун III форумунда сөз сүйлөдү.
Улан Маматканов өз сөзүндө билим берүү жана илим жаатындагы кызматташтык Кыргызстан менен Өзбекстандын стратегиялык өнөктөштүгүнүн маанилүү бөлүгү экенин баса белгиледи.
Ал мамлекеттердин өнүгүүсүндөгү негизги ресурс бүгүнкү күндө билим, инновация жана адам капиталы болуп саналаарын, ал эми университеттер илимий изилдөөлөрдүн, жогорку квалификациялуу кадрларды даярдоонун жана заманбап технологияларды өнүктүрүүнүн борборлору болушу керектигин белгиледи.
Министрлер кабинетинин төрагасынын орун басары ошондой эле академиялык мобилдүүлүктү кеңейтүү, биргелешкен билим берүү программаларын жана илимий долбоорлорду ишке ашыруу, ошондой эле эки өлкөнүн жогорку окуу жайларынын ортосундагы өз ара аракеттенүүнү бекемдөө зарылчылыгына токтолду.
Белгиленгендей, иш-чарага эки өлкөнүн жогорку окуу жайларынын жетекчилери, мамлекеттик органдардын, илимий жана академиялык коомчулуктун өкүлдөрү катышты.
