Бишкек, 19.03.25. /Кабар/. Чүй облусунун Ысык-Ата районундагы мыйзамсыз менчиктештирилген бала бакча мамлекеттин менчигине кайтарылды. Бул тууралуу Улуттук коопсуздук мамлекеттик комитетинен билдиришти.
Атайын кызмат тарабынан текшерүү иштеринин натыйжасында Чүй облусунун Ысык-Ата районундагы Сын-Таш а/а жайгашкан бала бакча мамлекетке кайтарылды.
2005-жылы жогоруда аталган 140 орундуу мектепке чейинки билим берүү мекемеси мыйзамсыз түрдө Ош шаарынын экс-мэри Ч.С. (2003-жылы Ош шаарынын мэри болгон) тарабынан менчиктештирилген.
Көрүлгөн иш-чаралардын алкагында, Ысык-Ата районунун Сын-Таш а/а Советская айылы, Новая көчөсү №19а үй дарегинде жайгашкан, аянты 0,53 га, колдонууга жарактуу аянты 1094 кв.м болгон бала бакча мамлекеттин балансына кайтарылды.
Аталган Бала бакча 2025-жылдын 14-мартында "Мүлктү менчикке өткөрүү жөнүндө" келишимге ылайык, Чүй облусунун Ысык-Ата районунун Сын-Таш айыл өкмөтүнүн балансына өткөрүлдү.
