Бишкек, 01.10.26. /Кабар/ WhatsApp өспүрүмдөрдүн коопсуздугун күчөтүү үчүн ата-энелерге арналган жаңы көзөмөл функцияларын киргизет. Бул тууралуу Казинформ BBCге таянуу менен билдирди.
Жаңы функциялар аркылуу ата-эне өспүрүмдүн кайсы топко кошулганын же топтон чыкканын билип, анын профилдик сүрөтүн кимдер көрө аларын жана кимдер аны топторго кошо аларын чектей алат.
Ошондой эле ата-эне WhatsAppтагы Channels функциясын жана Meta AI жардамчысын колдонууга байланыштуу айрым жөндөөлөрдү башкара алат. Meta AI үчүн “13+” же “Чектелген контент” режимин тандоого болот.
Ошол эле учурда ата-энелер баланын жеке каттарын окуй албайт жана чалууларын көрө албайт. Жеке маалыматтар шифрлөө менен корголот.
Көзөмөл функцияларын колдонуу ата-эненин каалоосуна жараша болот. Ата-эне атайын PIN-код коюп, өспүрүмдүн белгиленген чектөөлөрдү өз алдынча өчүрүүсүнө жол бербейт.
WhatsApp бул жаңылыктар ата-эне менен өспүрүмдүн мессенджерди коопсуз колдонуу тууралуу ачык сүйлөшүүсүнө шарт түзөрүн белгиледи.
Жаңы чаралар дүйнөдө технологиялык компанияларга балдардын онлайн коопсуздугун күчөтүү боюнча талаптар өсүп жаткан учурда киргизилүүдө.
