Бишкек, 08.10.25. /Кабар/. Улуттук телерадиоберүү корпорациясынын автопаркы атамекендик өндүрүштөн чыккан 15 даана “Шевроле Трекер” үлгүсүндөгү жаңы унаа менен толукталды.
Корпорациянын маалыматына ылайык, автоунаалардын ачкычтарын тапшыруу аземине президенттин администрациясынын маалыматтык саясат кызматынын жетекчиси Дайырбек Орунбеков катышып, бул жаңылануу УТРКнын ишмердүүлүгүндө маанилүү кадам экенин белгиледи.
15 автоунаанын ичинен 7 даанасы УТРКнын облустук каналдарына, ал эми 8 даанасы борбордук каналдарга бөлүндү.
Белгиленгендей, УТРКнын автопаркы акыркы жолу 10 жыл мурун, тагыраагы 2013-жылы колдонулган (2003–2004-жылы чыккан) автоунаалар менен толукталган. Убакыттын өтүшү менен алар эскирип, оңдоп-түзөөгө көп каражат талап кылып келген.
"Бул унаалар тышкы жардамсыз, УТРКнын ички резервдерин туура жана сарамжалдуу пайдалануунун негизинде, мекеменин өз каражатына сатып алынды",-деп айтылат маалыматта.
