Бишкек, 05.11.25. /Кабар/. Угуусу бузулган бейтаптарга кохлеардык имплант коюу операциялары жасалды. Бул тууралуу Саламаттык сактоо министрлигинен билдиришти.
Маалыматта белгиленгендей, Улуттук госпиталдын базасында Катардан келген адистер менен биргеликте кохлеардык имплант коюу операциялары ийгиликтүү өттү.
Операциялар толугу менен акысыз негизде жасалды. Муну менен өлкөнүн ар кайсы региондорунан келген жети чоң адам угуу жөндөмүн калыбына келтирүү мүмкүнчүлүгүнө ээ болушту.
Операцияларды өткөрүү үчүн керектүү материалдарды катар тарап камсыздады. Улуттук госпиталдын дарыгерлери кохлеардык имплантация жаатында өз кесиптик чеберчилигин жогорулатып, тажрыйба алмашуу мүмкүнчүлүгүнө ээ болушту.
Маалымат үчүн: Кохлеардык имплантация — бул угуу жөндөмүн олуттуу деңгээлде жоготкон адамдардын угуусун калыбына келтирүүгө мүмкүнчүлүк берген жогорку технологиялык хирургиялык ыкма.
