Бишкек, 02.03.26. /Кабар/. Бүгүн, 2-мартта президентке караштуу Улуттук илимдер академиясында президенттин администрациясы тарабынан уюштурулган илимий институттардын жетекчи кызматкерлери үчүн окутуу курсу жыйынтыкталды.
Аталган окуу курсу президенттин “Улуттук дем – дүйнөлүк бийиктик” уңгу жолу жөнүндө жарлыгын ишке ашыруу максатында өткөрүлдү.
Жыйынтыктоочу иш-чарага мамлекеттик катчы Арслан Койчиев катышты. Ал уңгу жолдун мазмуну жана анын билим берүү тармагындагы мааниси тууралуу өзүнүн ой-пикирин билдирүү менен бирге окуу курсунун угуучуларына атайын даярдалган сертификаттарды тапшырды.
Окуу курсун аяктаган насааткерлер өздөрү эмгектенген мекемелердин жамаатына, коомчулуктун өкүлдөрүнө уңгу жолдун мазмунун кеңири түшүндүрүп, жаштардын улуттук аң-сезимин калыптандырууга жана маданий мурастарды сактоого багытталган иш-аракеттерине алган тажрыйбаларын кеңири пайдалана алышат.
