Бишкек, 10.03.26. /Кабар/. Кыргыз-кытай чек арасындагы "Торугарт" өткөрүү пунктунда жүк ташуучу унаалар үчүн электрондук кезек системасынын пилоттук долбоору ишке кирди. Бул тууралуу Мамлекеттик бажы кызматынан билдиришти.
Бүгүн Бажы кызматынын жетекчилиги аталган пунктка барып, жаңы системанын иши жана инфраструктураны модернизациялоонун жүрүшү менен таанышты.
Буга чейин кезектин узундугу 25 чакырымга чейин жетип, жол инфраструктурасына жана Чатыр-Көл аймагынын экологиясына терс таасирин тийгизип келген. Эми унаалар "Кара-Булак" күтүү аймагында токтоп, электрондук тизмеге ылайык этап-этабы менен чек арага жөнөтүлөт. Жүк ташуучулар өткөрүү тартибин алдын ала түзө алышат.
Мамлекеттик бажы кызматынын төрагасынын орун басары Кыялбек Мукашов инспекциялык-тыкыр кароо комплексинин курулушу жана административдик имараттарды реконструкциялоо иштерин көрдү. Ошондой эле, бизнес өкүлдөрү жана айдоочулар үчүн жаңы заманбап күтүү залы ачылды.
Бул долбоор министрлер кабинетинин токтомуна жана бажы кызматынын 2026-2030-жылдарга карата өнүгүү концепциясына ылайык ишке ашырылууда.
