Бишкек, 30.09.25. /Кабар/. Бүгүн Бишкек-2 темир жол бекетине туристтик Golden Eagle Luxury Trains поезди келди.
"Кыргыз темир жолунан" билдиришкендей, поездде 60тан ашык чет өлкөлүк туристтер болду. Аларды темир жолдун кызматкерлери музыканын коштоосунда шаңдуу тосуп алышты. Андан соң коноктор Бишкек шаарынын кооз жана тарыхый жайларын кыдырууга жол алышты.
Аталган туристтик поезд Кыргызстанга 29-сентябрда келип, Ысык-Көл облусунун Балыкчы бекетине багыт алган. Туристтер Ысык-Көлдүн тарыхый, маданий жана жаратылыш кооздуктарына күбө болуп, кайрадан Бишкекке кайтып келишти.
Белгилеп кетсек, быйылкы 2025-жылдын башынан бери бүгүнкү күнгө чейин 7ге жакын эл аралык туристтик поезддер Кыргызстанга келип кетти. Алдыда дагы октябрь айында бир катар туристтик поезддердин келүүсү күтүлүүдө.
