Бишкек, 09.10.26. /Кабар/. SpaceX компаниясынын кемеси Эл аралык космостук станцияда (ЭКС) сегиз ай иштеген америкалык, франциялык жана россиялык төрт космонавтты Жерге алып келди. Кеме Тынч океандын Лос-Анжелестеги жээгине конду. Бул тууралуу Казинформ билдирди.
Анда америкалык Джессика Мейр менен Жек Хэтэуэй, франциялык Софи Адено жана россиялык Андрей Федяев кайтып келишти.
Алар февраль айында станцияга барып, экипаждын ооруп калган мүчөсүнө байланыштуу мөөнөтүнөн мурда Жерге кайтарылган төрт кесиптешинин ордун алмаштырышкан. Бул окуя NASAнын 65 жылдык тарыхында адам катышкан космостук миссиянын алкагында биринчи жолу медициналык себептен эвакуациялоо болгон.
Миссия учурунда экипаж станцияны техникалык тейлөө жана жаңылоо иштерин жүргүзгөн. Джессика Мейр ачык космоско төрт жолу, ал эми Софи Адено үч жолу чыккан. Ошондой эле экипаж “Артемида-II” миссиясынын астронавттарынын Айды айланып учушуна күбө болгон.
Космонавттар жумуштан тышкары эс алууга да убакыт табышып, бий кечелерин жана кулинардык мастер-класстарды уюштурушкан. Мейр тармал чачтуу аял космонавттар үчүн окутуучу видео тартса, Жек Хэтэуэй муруту менен кесиптештеринин эсинде калган.
Учурда станцияда АКШ, Россия жана Канаданын жети өкүлү калууда. 2000-жылы станция иштей баштагандан бери ага 26 өлкөдөн 298 адам барган.
