Бишкек, 30.10.26. /Кабар/. Анкарада өтүп жаткан Түрк дүйнөсүндөгү диалог форумунун алкагында "Түрк дүйнөсүндөгү дипломатиядагы аялдар" аттуу панелдик талкуу өттү. Ал түрк мамлекеттеринин саясий жана дипломатиялык жашоосундагы аялдардын ролуна, мамлекеттер аралык диалогду кеңейтүүгө жана гуманитардык байланыштарды чыңдоого багытталган.
Форумду Түркиянын Президенттик администрациясынын коммуникациялар боюнча башкармалыгы уюштурду. Талкууга Кыргызстандын Улуттук илимдер академиясынын вице-президенти, философия илимдеринин доктору жана профессор Гүлнара Ботоканова катышты.
Ал аялдарды урматтоо, алардын коомдук жашоого кызуу катышуусу кыргыз элинин жана жалпы түрк цивилизациясынын тарыхый жана руханий мурастарында маанилүү орунду ээлей турганын белгиледи.
Катышуучулар илим, билим берүү, дипломатия жана коомдук жашоодо аялдар үчүн мүмкүнчүлүктөрдү кеңейтүү үчүн түрк мамлекеттеринин күч-аракетин бириктирүү зарылдыгына өзгөчө басым жасашты. Гүлнара Ботоканова аймак өлкөлөрүнүн илим академияларынын базасында Түрк дүйнөсүнүн аял окумуштууларынын жана новаторлорунун тармагын түзүүнү сунуштады. Мындай платформа биргелешкен изилдөө долбоорлорун, такшалма программаларын иштеп чыгууга жана илим, билим берүү, инновация жаатында тажрыйба алмашууга өбөлгө түзөт деп болжолдонууда.
Ошондой эле академиялык жана дипломатиялык мобилдүүлүк программаларын кеңейтүү, гранттардын санын көбөйтүү жана жаш аял изилдөөчүлөрдүн, дипломаттардын жана коомдук пикир лидерлеринин арасында кесиптик алмашуу мүмкүнчүлүктөрүн жогорулатуу сунушталды.
Кызматташтыктын дагы бир багыты - түрк дүйнөсүнүн руханий жана маданий мурастарын сактоо жана жайылтуу. Тактап айтканда, бул салттуу баалуулуктарды аялдардын укуктары жана мүмкүнчүлүктөрү жөнүндөгү заманбап түшүнүктөр менен айкалыштырган биргелешкен гуманитардык жана маданий долбоорлорду ишке ашырууну камтыйт.
Ботоканованын айтымында, бул багыттар боюнча кызматташтыкты күчөтүү жалпы гуманитардык мейкиндикти түзүүгө, кесиптик байланыштарды кеңейтүүгө жана түрк мамлекеттеринин коомдук жана эл аралык жашоосундагы аялдардын ролун жогорулатууга өбөлгө түзөт.
Талкуунун катышуучулары аялдардын дипломатияга жана чечим кабыл алуу процесстерине катышуусун жогорулатуунун маанилүүлүгүн баса белгилешти. Алар түрк дүйнөсүнүн аялдары жалпы баалуулуктарга жана максаттарга таянып, аймактын өнүгүшүнө дагы да олуттуу салым кошо алышат деген үмүттөрүн билдиришти.
