Бишкек, 23.07.26. /Кабар/. Маданият, маалымат жана жаштар саясаты министри Мирбек Мамбеталиев Түрк мамлекеттер уюмунун башкы катчысы Кубанычбек Омуралиев менен жолугушту.
Ведомстводон маалымдашкандай, жолугушууда түрк мамлекеттеринин ортосундагы маданий-гуманитардык кызматташтыкты өнүктүрүү, жалпы тарыхый жана маданий мурастарды сактоо боюнча биргелешкен долбоорлор талкууланды.
Тараптар маданий форумдарды жана фестивалдарды өткөрүү, тарыхый эстеликтерди санариптештирүү, музейлер менен китепканалардын ортосундагы кызматташтыкты күчөтүү маселелерине көңүл бурушту.
Жолугушуунун жыйынтыгында Кыргызстан менен ТМУга мүчө мамлекеттердин ортосундагы маданий байланыштарды мындан ары кеңейтүү боюнча биргелешкен иштерди улантуу макулдашылды.
