Бишкек, 17.04.26 /Кабар/. Министрлер кабинетинин төрагасынын орун басары Эрлист Акунбековдун жетекчилиги алдында Транспорт жана коммуникациялар министрлигинин 2025-жылда аткарган иштери жана 2026-жылга карата аткарылуучу иш пландары каралган жыйын болуп өттү.
Отурумда алгач министрликтин жалпы ишмердүүлүгү, өлкө боюнча жасалып жаткан республикалык деңгээлдеги жолдордун курулушу, бул багытта бөлүнгөн каражаттардын өздөштүрүлүшү, ведомствону санариптештирүү багыты, алдыдагы иш пландар жана маселелер тууралуу министр Талантбек Солтобаевдин маалыматы угулду.
Маселен, 2021–2025-жылдар аралыгында жол тармагын каржылоо динамикасы өсүп, Транспорт жана коммуникациялар министрлигине республикалык бюджеттин эсебинен бөлүнгөн каражат эки эсеге көбөйгөн.
Аны менен катар өлкөдө жол куруу жана оңдоо иштеринин көрсөткүчү жогорулаган. Республика боюнча министрлик 2021-2025-жылдары 3 684,2 км жол бүткөрсө, анын ичинде 2025-жылы 1 545 км жол бүткөрүлгөн.
Ал эми 2026-жылга карата министрлик өлкөнүн жол тармагына бекитилген бюджетине ылайык 1 500 км ашуун жолдорду куруу жана оңдоо иштерине милдеттендирилген. Мындан тышкары, учурда өлкө боюнча 30га жакын негизги маанилүү долбоорлор боюнча объектилерде пландуу иштер аткарылууда.
Министрлер кабинетинин төрагасынын орун басары Эрлист Акунбеков быйыл Кыргызстанда Шанхай кызматташтык уюмуна мүчө мамлекеттердин башчыларынын катышуусундагы саммитти, кезектеги Дүйнөлүк көчмөндөр оюндарын өткөрүү сыяктуу маанилүү эл аралык иш-чаралар пландалганын айтып, ага байланыштуу үстүбүздөгү жылга жол тармагы боюнча коюлган пландарды өз мөөнөтүндө жана сапаттуу аткарууну тапшырды.
Ошондой эле президент Садыр Жапаровдун жакында эле өлкөнүн Ош облусунун эли менен болгон жолугушуусунда көтөрүлгөн жол маселелерин ыкчам чечүү керектигин эскертип өттү. Мындан тышкары, жайкы туристтик мезгилге карата жолдорду ачууну, кеңейтүүнү, жол жээктерин иретке келтирүү боюнча иштерди күчөтүлгөн тартипте алып баруу керектигин кошумчалады.
