Бишкек, 02.04.25. /Кабар/. Бүгүн транспорт жана коммуникациялар министри Абсаттар Сыргабаев Нарын облусуна болгон иш сапарынын алкагында Нарын — Баетов унаа жолунун курулушун текшерди. Бул тууралуу ведомстводон маалымдашты.
Министр аталган унаа жолдун 33-38-чакырымындагы 72 метр көпүрөнү куруу иштерин жеринен көрдү. Бүгүнкү күндө көпүрөнүн свайларын куюу жумуштары жүрүп жатат. Ал эми Ак-Кыя тилкесинде (8-13 км) суу өтүүчү канал курулууда.
Министр Сыргабаев Нарын — Баетов унаа жолунда аткарылып жаткан жумуштардын кечеңдеши жергиликтүү тургундарга ыңгайсыздык жаратып жатканын белгилеп, иш ыргагын ыкчамдатуу, сапатына көңүл буруу, керектүү материалдардын жетишсиздиги жаралган учурда маселени ыкчам чечүү тапшырмасын койду.
Белгилей кетсек, Нарын — Баетов унаа жолунун жалпы узундугу 120 чакырымды түзөт. Анын 46 чакырымын оңдоо каралган, жол 2 тилкелүү болот.
