Бишкек, 22.04.25. /Кабар/. Токмок шаарындагы мрамор жана керамикалык-гранит плиталарын чыгаруучу "Кыргыз Тоо-Таш" заводу мамлекеттин балансына өткөрүлдү. Бул тууралуу Улуттук коопсуздук мамлекеттик комитетинен билдиришти.
Маалыматка ылайык, "Кыргыз Тоо-Таш" заводу 60-жылдардан тартып, Бүткүл союздук мааниге ээ болгон жана СССРдин көптөгөн шаарларын таш менен камсыз кылган. Бишкектин муниципалдык имараттарынын 60% дан ашыгы "Кыргыз Тоо-Таш" (гранит, мрамор, акиташ ракушечник, шагыл) материалдарын колдонуу менен курулган.
Өндүрүш модернизацияланган жана Италиядан алынып келинген эң заманбап жабдууларга негизделип, заводдун карамагында өзүнүн карьерлери, кирүүчү темир жол жана жүк ташуучу унаалар паркы бар.
Айлык өндүрүштүн көлөмү 30 миң чарчы метрден ашык каптоочу плиталарды (мрамор, акиташ, гранит) түзөт.
Ошол эле учурда жогоруда аталган ишкананын ишмердүүлүгү даяр продукцияны ири көлөмдө экспорттоого багытталган.
"УКМК тарабынан мыйзамсыз менчиктештирилген объекттерди аныктоо жана мамлекеттин менчигине кайтаруу боюнча иш-чаралардын жана кылмыш жолу менен алынган кирешелерди легалдаштыруу фактысы боюнча катталган сотко чейинки өндүрүштүн алкагында жүргүзүлгөн тергөө-ыкчам иш-чаралардын жыйынтыгы боюнча Мамлекеттик мүлктү башкаруу боюнча мамлекеттик агенттиктин атынан Токмок шаарында жайгашкан "Кыргыз Тоо Таш" өндүрүштүк масштабындагы керамикалык -гранит буюмдарын, мрамор плиталарын жана кум-шагыл аралашмасын өндүрүү боюнча завод мамлекеттин балансына өткөрүлүп берилди",-деп айтылат маалыматта.
