Бишкек, 08.07.25. /Кабар/. АКШнын Техас штатын каптаган селден кеминде 109 адам каза болуп, 160тан ашууну дайынсыз болууда. Бул тууралуу Синьхуа маалымдады.
Агенттиктин маалыматына караганда, учурда Гвадалупе дарыясынын жээгинде куткаруу иштери уланууда. Каза болгондордун 87си Керр округунда болгон.
Техас штатынын губернатору Грег Эббот брифингде издөө иштери Гвадалупе дарыясынын тутумунда улана турганын айткан.
“Биз дайынсыз жоголгондорду табуу үчүн талыкпаган иш алып барабыз”,-деген ал.
АКШнын Улуттук метеорологиялык кызматы Техас штатындагы Керр округунун бир нече шаарларында селден улам өзгөчө кырдаал жарыялады.
CNN телеканалынын маалыматы боюнча, аймактагы жарым миллиондон ашык адам суу каптоо коркунучунда турат.
