Бишкек, 19.01.26. /Кабар/. Узап кеткен жуманын аягында Бишкекте абанын температурасы кескин төмөндөп, кар жаады. Шаар тургундары жолдордун тазаланбай жатканы боюнча соцтармактарда сын-пикирлерин айтышкан. Ал арада “Кабар” агенттигине мэр Айбек Жунушалиев карды тазалоо иштерине “Тазалык” ишканасы жетишкенин белгиледи.
“Бул ирет жолдорду тазалоого “Тазалык” ишканасынын бардык техникалары чыкты. Биз жолдорду тазалоого жетишип жаттык. Ишемби күнү соцтармактарда көп учурда техникалар келбей жатат деген сын-пикирлер тарап жатты. Тазалоо иштеринин да өзүнүн ыкмалары бар. Биринчи кар жааганда туз себилип, кар ээриш үчүн бир аз турушу шарт. Андан соң гана техникалар карды тазалашат. Жолду ээритпей удаа-удаа тазалай берсек, анда карды ныктап алабыз. Ишканага алынган техникалар жетишсиз. Дагы жаңы техникаларды алуу керек”, - деди ал.
