Бишкек, 26.02.25. /Кабар/. Күн мурун президенттин Жалал-Абад облусундагы өкүлү Тилек Текебаев Таш-Көмүр шаарынын муниципалдык ишканаларына алынган 7 даана атайын техникалардын ачкычын тапшырды.
Өкүлчүлүктөн билдиришкендей, техникалар республикалык бюджеттен аталган шаарды өнүктүрүүгө бөлүнгөн 100 млн сомдун эсебинен алынган. Жалпы баасы 29 млн 371 миң сомду түздү.
Мында эксковатр, автомунара, 2 таштанды ташуучу, 1 суу ташуучу жана эки даана ассенизатор техникалары бар.
Облус башчысы жаңы техникалар шаардын тазалыгын камсыздоо, жашоочулардын муктаждыктарын жеңилдетүү максатында алынганын белгиледи. Ага катар Таш-Көмүр шаарынын жергиликтүү бюджетине кошумча салым катары өлкө казынасынан бөлүнгөн каражат, шаардын негизги көйгөйлөрүн чечүүгө шарт түзгөнүн билдирди.
