Бишкек, 06.07.26. /Кабар/. Талас облусунун Айтматов районунда жайгашкан “Маржан Апа” эс алуу борбору тийиштүү документтери жок, мыйзамсыз курулуп жатканы аныкталды.
Курулуш министрлигинен билдиришкендей, текшерүүнүн жүрүшүндө Кара-Сай айылындагы аталган объект шаар куруу жана архитектуралык корутундусу, ошондой эле бекитилген долбоордук документациясы жок иш алып барганы белгилүү болгон. Бул "Шаар куруу жана архитектура жөнүндө" мыйзамын одоно бузуу болуп саналат.
Мыйзам бузуулардын жыйынтыгында жеке ишкер А. у. Б.га карата административдик чара көрүлүп, 200 миң сом өлчөмүндө айып пул салынды.
Ошондой эле кемчиликтерди жоюу жана курулушту талапка ылайык келтирүү боюнча жазуу түрүндө эскертүү берилди. Мамлекеттик орган аймактагы курулуш объектилерине көзөмөл жүргүзүүнү улантууда.
