Бишкек, 02.09.26. /Кабар/. Талас облусунун Манас районунда болгар калемпиринин түшүмүн жыйноо иштери башталды.
Суу ресурстары, айыл чарба жана кайра иштетүү өнөр жайы министрлигинен билдиришкендей, быйыл райондо Ласточка сортундагы калемпир 1 миң 350 гектар жерге эгилген.
"Учурда орточо түшүмдүүлүк гектарына 200-250 центнерди түзүүдө. Дыйкандар түшүмдү ички рынокко сатуу менен катар Россия жана Казакстанга экспорттоодо. Базарда болгар калемпиринин баасы сапатына жана көлөмүнө жараша орточо 40-45 сомду түзүүдө", - деп айтылат маалыматта.
Белгилей кетсек, Манас районунда болгар калемпирин өстүрүү акыркы жылдары экспортко багытталган айыл чарба продукциясынын маанилүү багыттарынын бирине айланды.
