Бишкек, 02.10.25. /Кабар/. Талас шаарында "Баластан" соода жана оюн-зоок борборунун курулушу башталды. Бул тууралуу Курулуш, архитектура жана турак жай-коммуналдык чарба министрлигинен билдиришти.
Күн мурун министр Нурдан Орунтаев курулуш иштеринин жүрүшү менен таанышты.
Аталган борбор Талас шаарынын Шамбетов көчөсү №70 дарегинде курулууда. Курулуштун жалпы аянты – 17 миң чарчы метрди түзөт.
Курулуш иштери министрликке караштуу "Кыргызкурулуш" мамлекеттик ишканасы тарабынан көзөмөлдөнүп, республикалык бюджеттин эсебинен каржыланууда.
Соода жана оюн-зоок борборунун эскиздик долбоору Талас шаардык Шаар куруу жана архитектура департаменти тарабынан иштелип чыккан.
Учурда курулуш объектисинде жер казуу (котлован) иштери активдүү жүрүп жатат.
