Бишкек, 27.04.26. /Кабар/. Талас шаарында жаңы борбордук сейил бактын курулуш иштери 80 пайызга бүткөрүлдү. Бул тууралуу муниципалитеттен билдиришти.
Башкы планга ылайык, сейил бактын жалпы аянты 1,5 гектарды түзөт. Анда 8 аттракцион, заманбап оргума, жашыл эс алуу аймактары, унаа токтотуучу жай жана көрктөндүрүү иштери каралган.
Учурда долбоордун алкагында эс алуу аймактары, аттракциондор жана заманбап инфратүзүмдөр курулуп жатат. Иштердин басымдуу бөлүгү аяктап, тышкы жарыктандыруу орнотулууда.
Жаңы сейил бак ишке берилгенден кийин шаар тургундары үчүн жагымдуу эс алуу жайына айланат.
