Бишкек, 27.04.26. /Кабар/. Айтматов районунун Шекер айылында "Чыңгыз Ааламы" маданий-мемориалдык комплексинде курулуш иштери кызуу жүрүүдө. Бул тууралуу президенттин Таластагы өкүлүлү Эрмат Жумаев билдирди.
Анын айтымында, жаңы комплекс залкар жазуучу, дүйнөлүк адабияттын чыгааны Чыңгыз Айтматов өмүрү менен чыгармачылык мурасын даңазалоого арналган.
"Учурда курулуш аянтчасында негизги бетон жана инфраструктуралык иштер кызуу уланып, долбоор бекитилген планга ылайык ырааты менен жүргүзүлүүдө. Долбоордун алкагында заманбап кинотеатр, китепкана жана мейманкана курулат. "Чыңгыз Ааламы" маданий-мемориалдык комплекси - бул жөн гана курулуш объектиси эмес, улуттук руханий мурасты сактоого, улуу инсандын чыгармачылык дүйнөсүн келечек муундарга жеткирүүгө багытталган тарыхый-маданий борбор болуп саналат. Шекер айылы - жазуучунун киндик каны тамган ыйык жер катары бул долбоор үчүн өзгөчө символдук мааниге ээ", - деди Жумаев.
Белгилүү болгондой, маданий-мемориалдык комплекс өлкөнүн эгемендүүлүгүнүн 35 жылдыгын Талас облусунда белгилөө иш-чараларынын алкагында президент Садыр Жапаровдун катышуусунда расмий түрдө пайдаланууга берилери күтүлүүдө.
